ʻAuhea ʻoukou?

E nā hoa ʻōlelo Hawaiʻi,

E kolekole mai a launa pū kākou ma ka ʻōlelo nani loa ē a nā kūpuna a me nā hanauna e hiki mai mai ana. E pane mai a e hōʻike i ko ʻoukou manaʻo.

Eia nō au e kakali ana i kahi pane.


Na Mālia

Aloha mai kākou!

ʻO au ʻo Mālia Melemai. He kumu kaiapuni au no ʻumikūmāwalu paha makahiki. Hoʻomaka au i kaʻu ʻoihana aʻo ma ke Kula o Pāʻia ma ka mokupuni ʻo Maui. A eia nō au ma ke Kula Kaiapuni ʻo Ānuenue e aʻo ana i ke kula waena, ʻoia hoʻi ka papa 7 a 8.

Aloha au i ka ʻōlelo Hawaiʻi. Ua ʻōlelo koʻu mau kūpuna kuakahi. ʻAʻole naʻe au i aʻo i ka ʻōlelo maiā lāua. Aʻo maila au i ka 'ōlelo ma ke kulanui.

Ma hope o koʻu hele ʻana i Kahoʻolawe no ka papa ES 221, ka papa a Daviana McGregor ma ke Kulanui o Hawaiʻi ma Mānoa, ua paʻa koʻu manaʻo e aʻo hou i ka ʻōlelo Hawaiʻi a ʻimi naʻauao i nā mea Hawaiʻi. Ua loaʻa maila kaʻu kekelē B.A. ma Hawaiian Studies i ka makahiki kula ma mua pono o ia makahiki. A hoʻi akula au i ke kulanui no ka ʻimi ʻana i kaʻu kekelē kumu aʻo.

I ia wā i maopopo leʻa ai iaʻu koʻu ala e holo ai ma koʻu ola. Lilo au i kākoʻo ma ka hui Operation Kuaʻana. ʻO au kekahi o nā kākoʻo mua loa no ia hui kākoʻo haumāna Hawaiʻi ma ke kulanui. Kau mai ka haliʻi o koʻu wā kulanui a nā wā aʻu i komo ai i nā hana kūʻē. ʻOia paha nā mea e paʻa ai koʻu manaʻo e lilo i kumu kaiapuni ʻōlelo Hawaiʻi. Aloha au i koʻu lāhui a me ka ʻōlelo. E like me ka mākia a ka mōʻīwahine hope loa o Hawaiʻi nei, a Liliʻuokalani---

ʻOnipaʻa